Ішек микрофлорасының бұзылуы – дисбактериоз – бұл ішек микрофлорасының сапалық және сандық құрамы қалыпты жағдаймен салыстырғанда өзгеретін патологиялық жағдай. Микроорганизмдердің ең үлкен әрі жақсы зерттелген қауымдастығы асқазан-ішек жолында (60–80%), атап айтқанда ішекте орналасқан. Ішек микробиотасының жағдайы адамның өмір сапасы мен ұзақтығына айтарлықтай әсер етеді.

Ішек микрофлорасы келесі қызметтерді атқарады: иммундық жүйені қолдайды және ауру тудыратын микроорганизмдерден қорғайды; тағамдық заттардың сіңуіне ықпал етеді, талшықтарды ыдыратып, өңдейді; майлар, көмірсулар және өт қышқылдарының алмасуына қатысады; жасушалардың инсулинге сезімталдығына, қандағы қант деңгейіне және тәбетке әсер етеді; ағзаға қажетті К, В1, В12 дәрумендерін және алмастырылмайтын аминқышқылдарын синтездейді; ішек перистальтикасын және оның ферменттерінің белсенділігін реттейді; зат алмасу өнімдерін бейтараптандырады; ішек қабырғасының оңтайлы өткізгіштігін қамтамасыз етеді және ағзадағы қабыну деңгейін төмендетеді.

Дисбактериоздың себептері әртүрлі болуы мүмкін: бактерияға қарсы терапия, теңгерімсіз тамақтану, тағам талшықтарының жеткіліксіз түсуі, дәрілік заттарды ұзақ уақыт қабылдау, иммун тапшылығы жағдайлары, эндокриндік бұзылыстар және асқазан-ішек жолы аурулары, жедел және созылмалы инфекциялар.

Дисбактериоздың бастапқы кезеңінде айқын белгілер болмайды, ал кейінгі кезеңінде байқалатын көріністер пайда болады.

Ішек дисбактериозы нәжістің бұзылуымен (іш қату немесе іш өту), іштің кебуімен немесе газдың шамадан тыс түзілуімен, іштің ауыруымен көрінеді.

Дисбактериозға ұқсас белгілер пайда болған жағдайда дәрігерден кеңес алу ұсынылады. Қазіргі таңда ішек микрофлорасын қалпына келтіру пробиотиктерді, пребиотиктерді және синбиотиктерді (пробиотиктер мен пребиотиктер кешені) қабылдау арқылы жүргізіледі.